Asakusa hag an Tokyo Skytree

Divizet hon oa dec’h da noz gant ar re all kaout emgav war fb pa zihunfemp evit gwelet petra ober. An hini ziwezhañ on bet o sevel tro 10e50. Emgav hon eus lakaet da 11e45 neuze.
Bet omp betek Asakusa, karter touristelañ Tōkyō ha brav eston e oa an amzer!Un tamm tro er park ha bet o tebriñ rāmen (toazennoù en ur volenn), ranket hon eus gourc’hemenn gant ur mekanik, pep tra a oa e  Japaneg (met unan eus ar strollad a anavez kanji zo, savetaet en deus ac’hanomp!), magus spontus ar pred (ha oa ket aes chom propr ouzhpenn) met mat (tapet em boa miso rāmen). Distroet omp un tammig da Asakusa e lec’h m’hon eus gwelet ul lodenn eus ur pezh c’hoari gant skolidi ha skolajidi, fentus ‘oa!
Gwelet hon eus ivez evit ar wech kentañ doare menec’h iskis o c’houlenn arc’hant (klevet em boa komz eus an dra-se, dre vras n’int ket Japaniz ha n’ouzer ket re evit piv eo an arc’hant). Treuzet hon eus ar pont ha bet omp da bourmen er c’harter un tammig c’hoazh. Prenet ‘m eus ma evaj kentañ en ur mekanik evel ma vez gwelet e pep straed (te yen blaz avaloù, ‘oa ket fall! ur skeudenn ‘m eus kavet) ha betek an Tokyo Sky Tree da c’houde, tour tele uhelañ ar bed !
Nevez eo an tour ha kalz tud a vez o weladenniñ. Ret eo mont da gemer un doare paperenn a ro un eur evit mont d’ober al lost da c’houde! Ur plas evit 7e30 hon eus bet, setu omp bet du-hont diouzh noz. En ur c’hortoz (peogwir e oa abred c’hoazh!) omp bet o kemer un tamm adverenn en ul lodenn sioul a-walc’h eus ar greizenn kenwerzh.
Ur banne latte matcha gant ur parfait matcha (skorn matcha, fav ruz, mochi, edaj, skorn vanilhez) evidon ha da welet stalioù a bep seurt an Tokyo SkyTree Town (ha Solamochi ‘m eus ket komprenet mat pep tra). Tro 7eur15 omp bet da c’hortoz a-benn prenañ an tikidi. Hir a-walc’h eo bet gortoz met mont a rae buan hag aozet mat e oa pep tra (ur baradoz evit ar streetpass e oa ouzhpenn :D). Tro 9 eur bennak omp pignet.
Brav-tre oa gwelet Tōkyō diouzh noz bamet on bet me gant ar bignerez, estreget an divskouarn ne vez santet netra pa bigner betek 350m (an estaj kentañ evit ar gweledva) ! N’omp ket bet betek an eil (da 450m), un tamm kêr evit nebeut a dra. (2000円 eo mont tre en estaj kentañ ha 1000円 ouzhpenn evit mont en eil!! Tro 25€ en holl!)
Distroet omp da dapout skeudennoù eus Asakusa diouzh noz (fentus gwelet an diforc’h, kalz siouloc’h an traoù…) ha setu!

Un dachenn un tamm resisoc’h ar wech-mañ. Tachenn templ Asakusa a zo bras-tre, ar park eus tu all ar rinier hag an Tokyo Sky Tree er reter.

(15 823 paz)