Mirdi ar manga, kastell Nijō ha tour Kyōto

N’am eus ket kousket mat-tre er guesthouse, fin kenañ ar vatarasenn ha pozet war ur blankenn… Ouzhpenn-se e oa ur plac’h o tiroc’hal er gambr! Savet on memestra evit mont da virdi ar manga. Plijus-tre al lec’h! N’eus ket ar gwir da gemer skeudennoù met a bep seurt a zo, ur sal diwar-benn an diazezoù (embann, istor hag all) ha diskouezadegoùigoù. En ur skol emañ ar mirdi ha kalz pezhioù ‘zo chomet evel ma oant.
Distroet on d’al leti ha bet o tebriñ curry e chadenn CoCo gant E&S, a-raok mont da welet kastell Nijō. Ur savadur plijus-tre eo, miret giz-kozh (ha n’eo ket deuet da vezañ ur mirdi gant diskouezadegoù a bep seurt evel kalz reoù all). Al liorzh a zo plijus ivez. Tapet ‘m eus an tren evit mont d’an templ e-kichen met faziet on tren, ne chome ket a-sav en arsavlec’h-se! Neuze on bet o tebriñ adverenn er starbucks (gwastelenn pumpkin pie an diskar-amzer 🙂 ) a-raok pignat e lein tour Kyōto. Ur sell a-feson a zo eus aze, an heol a groge da vont da guzh trankilik ouzhpenn. Distroet d’ar guesthouse. Da 7eur noz ‘moa emgav gant E&S. Bet omp er c’harter kenwerzhel gant straedoù goloet ha bet o tebriñ chirashi sushi. Mat-tre oa! Distroet omp sioul war-droad…(28 342 paz)

Hiroshima

Debret dijuniñ en ostaleri, mat e oa. Bet omp gant E&S betek kastell Hiroshima, dre ar park. Sioul ‘oa an traoù hag un diskouezadeg dedennus ‘oa diwar-benn tokarnoù e stumm loened! Siwazh ne oa ket ar gwir da dapout skeudennoù.Bet omp goude da straniñ e stalioù ar straedoù kenwerzhel, prenet ‘m eus ur re bravigoù-skouarn luchador met siwazh eo fals bravigoù (da biñsañ war ar skouarn) 😦 … a-raok mont da v/Mac Donald’s da dañva an hamburger ispisial evit an diskar-amzer (kroget adalek hirie) gant togoù-touseg (Kinoko Tsukimi burger, nevez ar bloaz-mañ). Kemeret ‘m eus ivez ar Mc Shake patatez dous (n’eo ket ken mouk hag ar pezh a vez lâret ^^).
Goude-se on bet o kerc’hat ma sac’h kein en ostaleri ha d’e lakaat en ti-gar. A-raok mont da bourmen betek park Hijiyama. Un dorgenn eo e Hiroshima hag ur sell brav a zo eus an uhel. Un aergelc’h all penn-da-benn. Bet on o welet levraoueg kêr ispisial manga, sioul an traoù… A-raok mont da welet mirdi arz a-vremañ a zo e-kichen.Dedennus ‘oa an diskouezadegoù. Ispisial-tre oa an eil, gant oberennoù Doris Salcedo, awenet gant darvoudoù ar 6 a viz Eost 1945. Anzav a ran on bet fromet…
Deuet on a-benn da dapout tren 4e17 evit mont betek Kyoto. Tremenet mat ar veaj.
Erruet on tro 6eur30 ha bet betek an ostaleri war droad… Ur sapre fazi! 5 kilometr ‘m eus bet d’ober gant ma sac’h kein pounner!! Skuizh marv e oan hag erruet on tro 8eur noz. N’on ket bet plijet kement-se gant ar guest house (Hannari) ouzhpenn…Un tamm diwezhatoc’h ‘m eus adkavet E&S evit debriñ koan en ur chadenn simpl (matsuya) met n’am eus ket bet c’hoant da straniñ re…(28 874 paz)

Arashiyama

Ur wech ouzhpenn hon eus tapet an tren (JR linenn Sagano moarvat) met ar wech-mañ omp chomet e Kyōto. Pell-tre eus kreiz-ker eo memes tra ha seblantout a ra ul lec’h disheñvel. Arashiyama eo. Pourmenadenn garetañ Tadashi eo ha kompren a ran a-walc’h perak. Bet omp gant ar bus betek un templ “bihan” gant ur bern delwennoù fentus (Otagi Nenbutsu-ji, poent uhelañ ar gartenn) ha diskennet gant un hent gant tiez kozh toennoù soul gante ha stalioù bihan artizanel. Ur bern arc’hant a zo bet dispignet aze… Bet omp ivez d’ul liorzh templig gant un istor trist-tre (Gio-ji) hag ur c’hazh bihan gwenn (hon eus gwelet!) : displeget eo mat gant Tadashi war e vlog.Goude-se hon eus kerzhet kalzig evit tizhout Jojakko-ji. Ur sell a-feson a zo war kêr Kyōto (gwelet ‘vez vezer pell eus kreiz-kêr memes tra!) hag ur bagodenn gozh a zo ivez. Tremenomp war-lerc’h dre ar c’hoad bambouz brudet (a zo just e-kichen ti-gar Torokko Arashiyama)…
Ha bet da zebriñ (gyudon : riz, kig bevin, onion hag un û), gant soubenn miso evel-just) e-kichen ar rinier Hozu, er preti 清修庵 (Seisyuan). Evel dibenn-pred hon eus holl tapet ur skornenn gant ur mestr (priziet ha tout) :  新八茶屋 (sinpachi). ^^

Te matcha ha bananez/kiwi.

War hent an distro omp bet da dempl Tenryu-ji templ gant ul liorzh vrav eston (bravañ templ zen Kyōto eo sañset). N’eo ket echuet diwezhat an devezh ha sikour ‘m eus bet gant Tadashi evit mirout ma flasoù tren evit an dibenn-sizhun. Goude-se on bet ma-unan betek savadur Nintendo hirie an deiz, gant ar metro. Digudenn ‘m eus kavet an traoù (radar Nintendo!) ha gwelet tud o kuitaat o labour tro 5e30 (‘m eus ket kredet goulenn diganto skeudenniñ ac’hanon dirak ar savadur ^^). En ur zistreiñ on faziet mik hent evit kuitaat an ti-gar ha ranket ober ur pezh tro met evel-se ‘m eus gwelet ur vanifestadeg enep nukleel. Fellout a rae din mont da dour Kyōto met un tamm berr e oa an amzer gant an istor-se. Distroet on d’al leti d’ober ma sac’h. Adkavet ‘m eus F&F ha ganto hon eus adkavet T ha G en ur preti touristel (a ginnige ur bern traoù disheñvel). Debret hon eus mat ha plijus eo bet an nozvezh ziwezhañ (e Kyōto evidon, e Japan evit an holl reoù all).

(25 319 paz)

Pourmenadenn e prefeti Shiga

Tapet hon eus an tren (JR linenn Biwako) ur wech ouzhpenn evit mont betek ti-gar Omihachiman. Tapet hon eus ur bus evit mont da weladenniñ kêriadenn Ōmihachiman (unan eus “ar c’hant lec’h da vezañ gwelet” e Japan!), ul lec’h leun a dud hag a vuhez, tro-dro d’ar c’hastell ha d’ar c’hanolioù, ul lec’h kenwerzhel pa oa serret c’hoazh an harzoù (e fin ar XVIvet kantved). Chomet eo mat an tiez du-hont. Dedennus e oa (bet omp er mirdioù a ziskouez tiez kozh miret evel ma oant).

N’hallan ket displegañ pep tra met aozet e vez ur festival gant kirri graet gant boued. Gounezet e oa bet gant hemañ warlene.

Goude-se omp pignet gant ar fungarr e lein ur menez Hachiman da welet lenn Biwa (Biwako) eus an uhel. Lenn ledanañ Japan eo.

Goloet ‘oa un tamm siwazh 😦

Un den kozh a zo chomet da gomz ganin, fentus e oa. Un templ brav a zo en uhel, Zuiryuji. Diskenet omp en-dro. Chomet omp da zebriñ ur pred kuri bevin ar vro a-hed ar ganol (e preti 茶寮 浜ぐら (Hamagura) plijet en deus spontus-din logo ar preti-se, Seiz Breur style un tamm me gav!). Ha goude-se, omp bet betek (gant an tren, linenn Biwako bepred) Hikone. En ur erruout e rae glav ha setu ni holl da vont da brenañ disglavierioù! Un devezh a-feson evit perc’henn ar stal ^^ (Disglavier n° 2 evidon neuze). Ha setu-ni da welet ar c’hastell bet savet e 1622. Unan eus kestell koad Japan eo, e-touez an 12 re gant un tour-meur orin hag unan eus ar 4 kastell gwelet evel teñzor broadel (evel Himeji). Da gentañ omp bet o welet Hikonyan, maskotenn ar gêr, ur c’hazh samourai lezirek ^^ Un tamm droch e oa an abadenn met fentus. Ar c’hastell a oa brav da weladenniñ, serzh ar skalieroù me lâr deoc’h! Brav e oa tro-dro d’ar c’hastell (liorzh Genkyu-en) peogwir e oa dispak-mat c’hoazh ar sakura.
Ur wech deuet en-dro (JR Special Rapid Service) da g/Kyōto omp bet gant un toullad reoù all e-krec’h an ti-gar (10vet estaj, «skyway») da welet ar gweledva. Un tammig dipitus e oa ha war a seblant eo kentoc’h ul lec’h emgav evit koubladoù (ofisiel pe get…). Ma skeudennoù n’int ket brav tamm ebet 😦
O klask e oamp dilhad evit A he doa riv ha sikouret ‘m eus anezhi peogwir e verzen e oa pell-tre er c’hef, anzavet he deus goude e oa laouen peogwir ne zeue ket a-benn da vont kuit, plac’h ar stal a ginnige traoù ouzhpenn dezhi. C’hoant hon eus bet goude da dañva gwestell «vie de france» ha graet ur c’hofad gwestell ^^

Un dra gant ur bern koavenn (dre ret!) ha fav. Un dra gant aozennoù “eus ar vro” e oa sañset.

Goude «koan» on bet ma-unan da glask war-lerc’h savadur kozh Nintendo pa oa un embregerezh Hanafuda (c’hoari kartoù). Un tamm poan ‘m eus bet o kavout ha war var e oan da zistreiñ d’al leti hep bezañ kavet peogwir e oan adpignet re en Norzh. Sur e oan koulskoude e oan tost… Hag a-greiz holl, goude ur pont bihan em eus soñjet «sell, un dra bennak e lâr se din…» ha setu-me just e-kichen! Na fier e oan! (Nintendo radar?) Didrouz mik ar straedoù, nebeut a dud d’an eur-se (9eur noz bennak e oa). 🙂Distroet on trankil d’al leti goude.

(Diskarget c’hoazh an 3DS!)

Pourmenadenn e Kyōto

Un devezh o pourmen e Kyōto a oa raktreset d’ar Meurzh. Un toullad e oamp o vont setu omp bet kaset gant ur bus prevez. Bet omp betek an templ Ryoanji (ar muiañ a gleiz war ar gartenn) hag e liorzh : sioul ha peoc’hus an aergelc’h… Bleunioù kerez a oa c’hoazh er gwez el liorzh e-kichen.
En ur guitaat ez on bet lakaet da dañva ur banne te tomm gant ur plac’h a oa o werzhañ te (ha traoù all) kazi evel soubenn e oa kentoc’h! Un tamm tro berr er bus ha setu-ni dirak ar c’h/Kinkaku-ji (“pavilhon aour”, eil a gleiz) a zo bamus a-walc’h da welet! Ul liorzh bras a zo tro-dro (hag un toullad mat a stalioù ha traoù a seurt-se). Distroet omp er bus ha parket e-kichen Shishigatani Dori evit adpignat un tamm Tetsugaku-no-michi (betek ar c’hroaz-hent gant) hag Imadegawa Dori (ul lodenn eus “hent ar brederourien” eo) evit mont davet  ar Ginkaku-ji (“pavilhon arc’hant”, an hini uhel a-zehou tout). Un tamm kozh eo ar savadur met anat ez eo al liorzh a zo da welet ar wech-mañ. Un drugar! Poent e oa mont da zebriñ. N’am eus ket kavet mat-tre ar pred evit ar wech kentañ.
Goude merenn omp bet d’an templ bras Kyomizudera evit echuiñ. Treuzet hon eus tout an takad “glaz” a zo a-raok (an daou boent e-kichen Higashi ward war ar gartenn), en ur dremen buan dre dempl Hongwanji ha dre ur vered divent ha bamus a-walc’h… Un toullad traoù a zo da welet en templ-bras-se ha prantadoù fentus a-walc’h a zo bet (‘m eus ket heuliet pep tra met tud eus ar strollad a zo bet test eus ur paotr o c’houlenn d’e vignonez dimeziñ gantañ da skouer). Dec’h em boa bet tro da verzout pegen aketus ha micherel e oa hon heñcher met hirie e oa bamusoc’h c’hoazh : prientiñ a ra goulennaouegoù bihan deomp da leuniañ evit deskiñ traoù diwar-benn al lec’hioù a weladennomp ha roet en deus deomp un tamm geriaoueg bihan ivez gant yezh lec’hel Kyōto (pe ar C’hansai kentoc’h, “Kansai-ben” a vez lâret). Tro ‘m eus bet da implijout troioù-lavar zo, trugarez da skouer (a zo ōkini e plas arigatō), berzh a ra er stalioù, me lâr deoc’h! 😉 Touristel-tre eo Kyōto hag un tamm poan ‘m eus bet gant an niver a dud, diseven a-walc’h, o vountañ ha tout (ur plac’h kozh he deus lakaet ma boued da gouezhañ war al leur hep digareziñ da skouer). N’am eus skeudenn ebet eus ma adverenn neuze T-T (yatsuhashi cream puff blaz te matcha, evel ma c’hallit gwelet war ar blog-mañ) hag ouzhenn e oa leun a goavenn matcha ma dilhad ha ma sac’h… Brav eston eo evel-just met n’on ket deuet a-benn da brofitañ e gwirionez… E-kerzh an devezh-se ‘m eus bet tro da welet en-dro daou baotr sympa a oa er c’harr-nij ganin. Ur wech echu omp bet o pourmen e straedoù kenwerzh hag e stal Ghibli da skouer. Plijus ar valeadenn. Distroet omp betek Yasaka (ar poent a chom, tamm-pe-damm e kreiz) en ur dremen dre straedoù a bep seurt, siouloc’h un tamm… Ur pred ispisial pesked a oa raktreset diouzh noz. Er preti Gion-emon 祇園えもん e oa (n’o deus lec’hienn ebet e saozneg met skeudennoù a zo!) Mat-tre oa ha plijus an aergelc’h ivez peogwir e oamp nebeut o kemer perzh (4, Tadashi en o-zouez). Goude koan, an tri ac’hanomp a zo bet o pourmen e templ Yasaka diouzh noz evit skeudenniñ al lec’h gant gouleier ha tout. Bet on me o prenañ boued ivez evit ar beure met ma-unan on bet oc’h ober an dra-se!

(16 193 paz)

Dizoloiñ Kyōto

Kousket ‘m eus mat spontus e-kerzh an noz met savet on abred dilun a-benn mont d’an onsen a-raok mont kuit da 8e15. Plijus ken-ken e oa kregiñ an devezh evel-se! Ur plac’h eus ar vro he deus gourc’hemennet ac’hanomp peogwir e raemp mat an traoù evit estrenien. 🙂 Un dijuniñ mod european hon eus bet er ryokan.

Sell en ur dont er-maez eus ar gambr, e trepas (digor) an ostaleri hengounel

Tapet hon eus ur bus kumun (al linenn T, adalek Shinanoki / Hakone Highland Hotel) a-benn mont betek ti-gar Odawara (an ti-gar tostañ evit kemer an trenioù tizh-bras davet ar c’hêrioù bras). Ne oa ket aes gant ar seier bras hag an hentoù meneziek a droidelle forzh pegement… Aze an hini ‘m eus merzet em boa ankounac’haet disglavier n°1 er ryokan! Kenavo, ra vi tapet gant tud all!
Aze ez eus bet tud o vont da d/Tōkyō en-dro ha reoù all da g/Kyōto eveldon met reoù zo o doa miret plasoù dija ha reoù all n’o doa ket (e gwirionez omp bet o c’houlenn met ne chome ket ken). N’eo ket grevus avat peogwir e oa un tren gant 5 gwetur gant plasoù n’int ket miret. Hikari 507 10e08 e oa. Kavet hon eus plasoù hep re a-boan (ret eo gortoz en un doare lostad dirak ar gweturioù ha kemer forzh peseurt plas dieub). E-kichen A e oan a komzet hon eus kalzig. Ur plac’h jentil-tre a oa n’em c’hichen he deus lâret din pa oa tu da welet ar Fuji mat ha tout. Skeudennoù ouzhpenn!

Hakone a zo al lenn bihan e-kichen Fuji hag ar sifr “1”. Kyōto a zo ar strollad poentoù ruz… Setu an hentad graet gant an tren ar beure-mañ neuze! Un 306 km bennak.

Kenji en doa lâret deomp kemer peadra da zebriñ en tren. Ur sandwich hag un evaj bennak evidon. Erruet omp e Kyōto da 12e14 (un tamm ouzhpenn div eur e lak neuze ar shinkansen-mañ, un tren tizh bras ha ne chom ket kalz a-sav) war ar c’hae 14 ha bet degemeret gant ur bern tud (krouer an ajañs hag ur paotr yaouank tutaet nevez-zo. Ar strollad kentañ da zegemer e oamp evitañ, hon heñcher hag ivez B a oa kuitaet digwener, soñj ho peus? Graet e droiad da Hiroshima hag adkavet ac’hanomp). Kaset omp bet betek an ostaleri ne oa ket re bell eus an ti-gar met ne oa ket prest ma gwele c’hoazh ha ret eo bet din laoskel ma sac’h en ur pezh a-ratozh. Bet omp o pourmen un tamm e Kyōto (karter Gion) e straedoù bihan gant Tadashi, hon heñcher. Kroget omp gant Shirakawa-minami Dori (ur bern tud gant dilhad hengounel a veze gwelet dija), chomet omp a-sav en ul lec’h evit ar vutunerien plijus-kenañ (ha goulo) e-kichen Hanamikoji Dori, a-raok pourmen e-kichen santual Yasaka ha park Maruyama, lec’h emgav heverk. Bet omp ivez dirak templ Ryozen Kannon (peadra da welet an delwenn vras) da gaout ur sell brav war ar gêr…

Straedoù bihan ha neudennoù tredan e pep lec’h…

Souezhadennoù a vez e straedoù Kyōto !

Goude-se on bet me da welet lid an te en Tea Ceremony Experience En. Un dra a-ratozh evit touristed gant lid an te buan e saozneg. Plijus oa ar plac’h ha goude bezañ diskouezet deomp e oa ret deomp ober d’hon zro. Mat e oa ma ze 😀 Klikit evit ur pennad klokoc’h diwar-benn al lid-se.
Pourmenet on c’hoazh e straedoù bihan Kyōto, e-kichen templ Kennin-ji da skouer e oa un templ kozh-tre… Bet on warlerc’h ma-unan gant Tadashi da c’hoariva Gion Corner a ginnig diskouez un tamm arzoù hengounel d’an douristed (ikebana, dañs meiko, bunraku…) Brav e oa da welet (ar bunraku dreist-holl) met displijus-tre an aergelc’h gant tud o skeudenniñ, o sevel, o komz dizoujañs-mik.Goude an abadenn-se e oa emgav evit mont da zebriñ ur pred «kaiseki», boued fin hervez ar c’houlz amzer. Er preti 町衆料理 京もん(Kyomon) e oa. Me gave din e vefe bet bamusoc’h (dreist-holl neuz ar meuzioù) met mat-kenañ e oa ar boued ha plijus aergelc’h ar strollad. Tadashi en doa troet ar roll-meuzioù penn-da-benn e galleg! Evel-se e c’hallemp heuliañ an traoù a-feur ma vezemp servijet. Ur mennozh jentil-tre ha plijus!

Riz gant pebr Japan, pesked bihan (!) ha soubenn miso

Aon am boa avat pas galloud kemer ma sac’h peogwir e oa erru diwezhat met n’eus bet kudenn ebet. En ur gambr 6 den on, chom a rae ur gwele en traoñ e-kichen ar prenestr. Kambreier paotred ha merc’hed mesket int. Er pempvet estaj e oan (an eil a zo al lodenn kegin, sal-foran), er gambr gentañ. Tri faotr ha teir flac’h oamp.
Ar rouedad na yae ket en-dro avat ha ne oan ket kustum ken! Met leun mat e oa bet an devezh ha ret mat e oa kousket a-benn an deiz war-lerc’h neuze…

(12 969 paz)