Pourmen dibal kostez Omotesando

N’am eus lakaet dihuner ebet goude an devezh start/iskis dec’h (ha dreist-holl penaos e oa echuet), raktreset em boa mont gant E&S betek an aerborzh ha lârat kenavo du-hont met aze int aet abred diouzh ar beure da glask war-lerc’h ur c’harr-nij bennak. Ma-unan ha dibal neuze! Sellet ‘m eus un tamm petra ‘oa d’ober war lec’hienn Time Out Tokyo ha bet c’hoant mont kostez Harajuku da glask war-lerc’h ar Burger King (ur burger iskis kenañ zo er mare-mañ!), gwelet un diskouezadeg bennak, mont da gemer ur banne chokolad e kafedi Lindt…
Klasket ‘m eus e-pad pell war-lerc’h ar Burger King, pignet ha adpignet straed Omotesando hep kavout ar stal. Goude ur mare ‘m eus paouezet evit mont da glask kentoc’h an diskouezadeg a oa war zu Shibuya. Gwelet ‘m eus un den a roe bruderezh evit kentelioù galleg, me gave din e oa dre aze ar palier arz e lec’h ma oa an diskouezadeg met n’am eus ket kavet kennebeut! Un nebeut delwennoù ‘m eus kavet war ma hent memestra! Chomet on da zebriñ e First Kitchen neuze a-raok mont da gafedi Lindt (se ‘m eus kavet!). Prenet lindor isipisial hag ur banne chokolad hag ur wastelennig. Menam! 🙂Goude-se on bet betek Shibuya trankil. War-var da zistreiñ e tour 109 da welet evit ar vroz eus ar robenn a blije din an deiz all met soñjet ‘m eus e oa trawalc’h a draoù ganin dija! E plas on bet d’ober un dro e Tokyu Hands.Goude-se on distroet d’ober war-dro ma malizenn (nag a draoù ‘m eus!), lakaet ma malizenn da vezañ kaset en Okayama ha diskuizhet rak abred eo ma zren ‘benn warc’hoazh!(13 813 paz)

Kreizenn Ainu, pred e Shiodome ha kizhier en Ikebukuro!

Ma-unan on bet betek kreizenn sevenadurel Ainu Tokyo, kichen an ti-gar. Kavet ‘m eus digudenn al lec’h met siwazh ne oa netra e saozneg ha den evit degemer ac’hanon e gwirionez. Un droig ‘m eus graet neuze, da sellet un tamm ouzh an traoù a vez diskouezet hag ouzh al levrioù met goude ur c’hard eur bennak em boa graet an dro setu on aet da bakañ ur banne kafe… (ha deuet a-benn da lakaat wifi Starbucks da vont en-dro war memes tro)
Bet on e ti-gar Shimbashi da gavout Kikuko. N’he deus ket kavet al lec’h emgav (dor Shiodome) em boa lakaet met pellgomzet he deus din ha n’eus bet kudenn ebet. Pignet omp e lein un tour (Shiodome City Center) da zebriñ merenn er preti WASYOKUEN SHIODOMETEN ( 和食 えん 汐留店). Mat-kenañ ar boued hag ur sell brav war ar Rainbow Bridge… Sikouret he deus ac’hanon da glask ur gasketenn base-ball evit gwaz ma c’hoar goude met n’hon eus ket kavet : ne vez ket gwerzhet kasketennoù gant logo ur skipailh er stalioù sport…
Adkavet ‘m eus E & S e Ikebukuro goude. Pourmenet hon eus er stalioù kenwerzh, er stal kit kat da skouer…
Da glask war-lerc’h ma c’hasketenn (a-benn ar fin!) ha betek Tokyu Hands evel-just. Pignet omp betek an Nekobukuro a zo disheñvel eus un neko cafe : ul lec’h evit ar c’hizhier hag an dud a c’hall pourmen e-barzh (n’eo ket ur c’hafedi gant kizhier o pourmen neuze). Kalz plijadur hon eus bet! Istorioù spontus ar c’hizhier (emgannoù ‘oa etre reoù ‘zo da vareoù zo), reiñ boued dezho, tapout skeudennoù…

This slideshow requires JavaScript.

Ul lec’h sioul a roe c’hoant kousket un tamm 🙂 Bez e oa kanaouennoù Disney e mod luskelloù, plijus ‘oa! Bet omp goude war-droad betek Otsuka. Gwelet hon eus an ti-gar a zo cheñchet-mik (ur greizenn kenwerzh a zo bremañ) ha bet o tebriñ sushi a dro. Goude omp bet o pourmen betek hon tier gant ar skornenn azuki a blije kement da E&S un droiad leun a hiraezh ha sioul. E-kichen hon ostalerioù o bet o pourmen ivez… Un nozvezh a-feson!

(22 050 paz)

Pourmen e Odaiba

Dimeurzh omp chomet holl da gousket. Dihunet on just re ziwezhat evit mont da dapout an dijuniñ >< Chomet on da straniñ un tamm. Goude ur mare hon eus lakaet emgav evit mont da Odaiba. E ti-gar Shiodome omp bet “sikouret” gant ur paotr kozh, en deus lakaet ac’hanomp da goll amzer muioc’h eget traoù all met fentus ha jentil ‘oa! Debret hon eus e Yoshinoya diouzhtu en ur erruout. Goude-se omp bet da Venus Fort. Dipitus un tamm al lec’h, keñveriet gant warlene… Ar stal iskis anvet “M” n’eus ket tu da vont ennañ ken, zoken evit sellet. Pezh n’eus plijet din ar muiañ a oa ober legoioù bihan ^^ hag un dro e levrdi Village Vanguard, evel boaz. E&S ‘oa o klask stalioù dilhad evit ar c’hizhier met n’hon eus kavet nemet traoù evit ar chas.
Goude omp bet da Aqua City. Kemeret hon eus un doare “frozen yogurt” evel e Osaka met un tamm dipitus (ha ker!) oa. Ur bern tud a oa pep lec’h ha komprenet hon eus e oa un devezh gouel (Shūbun no Hi, kedez an diskar-amzer) !! N’eus ket ken eus stal Capcom, E n’he deus ket kavet ar pezh a felle dezhi… 😦 Ar pezh n’eus plijet deomp a oa ar c’harter kozh giz amerikan, tamm soñj ebet eus an dra-se warlene. Ur bern tud a oa livet, war a seblant e oa un darvoud “Color Me Rad” dre aze… Bet omp goude-se da DiverCity, c’hwitet war ar c’hit kat wasabi ur wech ouzhpenn… Ha da welet ar Gundam bras. Aet e oa an heol da guzh ha gouleier oa er gwez, brav! Tremenet omp dre virdi digoust an otoioù evit tizhout an tren ha kavet un oto dic’hortoz… Distroet omp davet kreiz-kêr Tokyo, chomet a-sav e Shiodome. Debret hon eus toazennoù ha farset dirak bankoù iskis (anvet “The Chase” marteze? Pe 土下座ベンチ -degoza- gant Japaniz met n’am eus ket kavet an arzour) a-raok sellet ouzh horolaj Miyazaki o vont en-dro (da 8eur) ! Laouen e oan 🙂

Ha setu ni da zistreiñ…

(13 921 paz)

Harajuku hag onsen “mod gwechall”

Kousket kalzig ur wech ouzhpenn, ret eo lârat ne oan ket diskuizhet kalz en deizioù tremen!
Emgav da greisteiz evel boaz ha kollet un tammig amzer. Bet omp oc’h ober prenadennoù “fin beaj”, e Harajuku. Evidon loeroù hir ha ur c’himono. Bet omp oc’h evañ ur banne kafe en ul lec’h plijus (wired café) ha me ‘zo bet goude betek Shimbashi evit un emgav am boa gant beajourien all eus an ajañs. Erruet on gant lañs ha nec’het on bet un tamm, ne oan ket sur eus al lec’h emgav… Chomet on da c’hortoz ouzhpenn 1 eur! N’eo ket bet fentus, dreist-holl em boa laosket S, E ha B un tamm en un doare trumm (gant ma frenadennoù ouzhpenn -.-“)
Bet on me d’an onsen (ur wech ouzhpenn a-raok mont kuit!), ur massage shiatsu ‘m eus bet. Poanius eo bet un tamm! (met an den n’eus kavet ac’hanon “very cute”! war a seblant…) Ur sapre lec’h bras eo Ooedo Onsen Monogatari. Sañset eo da vezañ e-giz gwechall (mare edo) plijus eo met un neuz “uzin” penn-da-benn gantañ. Un tamm hegaset on bet gant ur familh am boa gwelet dija e-kerzh ar pred yakiniku met plijus e oa an dud all (chomet on da gomz gante e-pad ur pennad). An heñcher ‘zo aet kuit abred met me ‘zo chomet da brofitañ un tamm eus ar gibelloù memes tra! Hir a-walc’h e oa an hent evit distreiñ ha klasket ‘m eus war lerc’h ar re all goude (er gêr, er speak easy) ha c’hwitet war an holl! Un tamm trist e oan. E plas on chomet da gomz gant Sayaka he deus profet bizier din ^^ C’hoant he doa bet da bediñ ac’hanon da zebriñ gant he mignon da greisteiz met ne oa ket aze evel-just! Ur soñj plijus, domaj eo!

(10 404 paz)

Menez Takao

Ar wech-mañ e oa roet emgav e ti-gar Shinjuku a-benn mont da venez Takao (Takaosan).  Bet omp gant al linenn Keio (Keio (Takao) Line Special Express) betek ti-gar Takaosanguchi. Heol bras ha tomm eo bet an amzer an deiz-se. Pignet omp betek ar menez gant fungadorioù.

Bamus e oa! Ul lec’h touristel-tre eo, plijout a ra kalz d’ar familhoù pourmen dre amañ. Tud ‘zo a oa e vakañsoù c’hoazh d’am soñj ha kalzig tud a oa neuze. En o-zouez, un den kozh gant evned…
Ur sapre sell a zo war Tōkyō, Shinjuku dreist-holl (kornog Tōkyō neuze).Goude-se hon eus kerzhet trankil, ma ‘m eus komprenet mat omp bet dre an hent 1 (ruz war ar gartenn dindan), a zo an hent aes (an holl a c’hall mont, tud kozh, bugale hag all).

Kartenn o tont eus lec’hienn ofisiel ar Menez

Ur bern stalioù a zo ha kalz traoù gant an tengu. Un doue shinto eo an tengu (ki neñvel) ha dre m’eo Takao ur menez e vez gwelet pep lec’h ar yamabushi tengu (“ki neñvel a blij ar menez dezhañ”). Tudennoù gant divaskell evel brini int ha gant un dremm ruz, ur fri hir heverk. Sañset e c’haller gwelet marmouzien er menez-se ivez, un toullad skritelloù a zo evit lârat d’an dud chom hep boueta anezho ha diwall ne laerfent ket traoù.
N’hon eus gwelet hini gwir ebet…
Chomet omp a-sav da zebriñ merenn er preti 権現茶屋 (me gred!). Raamen hon eus debret ha fentus e oa peogwir e oa ret deomp flastrañ greun sezam da lakaat e-barzh ar pladad! (Droch on bet avat, ‘m eus ket tapet skeudennoù, evit gwelet penaos e oa e c’hallit mont du-hont) Debret hon eus er-maez gant ur gweledva a-feson… Un drugar!

Ul lodenn eus an hent davet an templ

Heuliet hon eus an hent betek templ Yakuōin Yūkiji.
Un templ brudet a-walc’h eo hag ur bern tud a oa, e gwirionez.

Dougoù-chañs e stumm sandalennoù bihan ^^

Tengu zoken war ar plakennoù pediñ! Gant sakura ouzhpenn… !

Chom a rae ul lodennig da bignat betek lein ar menez! Ne oa ket tu da welet Fuji-san avat! (d’am soñj ne welin ket anezhañ…)

Distroet omp dre an hent 4 (an hent mouk war ar gartenn, hent ar marv neuze, “ichi” o vezañ ar sifr pevar hag ar ger evit ar marv, ur sifr gwelet fall e Bro Japan) a oa brav eston! Tremenet omp dre ur pont koad.
War a seblant eo dreist pourmen e Takao da vare koyo (an diskar-amzer) hag anzav a ran e plijfe din kalz distreiñ! Ouzhpenn gant an niver a hentoù disheñvel ez eus peadra da zizoloiñ traoù nevez bep tro! C’hoariet ‘m eus a-hed an deiz da glask ar sielloù a oa strewet er menez, evel ar vugale ^^

Sell war an hent-tizh un tamm a-raok an “ti-fungarr”

Darbet eo bet din kouezhañ er skalieroù just en ur erruout el lec’h ma tapet ar fungarr, goude ur grapadenn dañjerusoc’h… Na lu! Met an dud e-kichen o deus goulennet “daijobu desu?” pezh a oa jentil 🙂 Diskennet omp gant ar fungarr ar wech-mañ neuze ha graet un tammig ehan a-raok adtapout an tren. Evit ar wech kentañ ‘m eus gwelet mekanikoù da werzhañ skornennoù (evel ma vez gwerzhet evajoù pep lec’h)! Fentus. D’am soñj eo un deiz-se ez eus deuet ar soñj din tañva limonadez tomm Minute maid. Ur soñj iskis met un drugar da evañ!! Ha setu ni distroet da d/Tōkyō. Buan on bet gant ar reoù all da lakaat ober hon JR pass (tikidi tren mat e-pad 7 devezh war tout linennoù trenioù ar gompagnunezh JR, a servijo din da vont da g/Kyōto. E gwirionez eo ret gourc’hemenn eus an estrenvro, resevet e vez un doare chekenn-eskemm ha gant ar chekenn-se e vez savet an tiked. Hir a-walc’h eo, ret eo leuniañ un toullad paperioù gant an devezhioù resis hag all met n’eo ket start.) e ti-gar Shinjuku. Goude ‘m eus redet evit adtapout ar strollad a yae da weladennin Tōkyō diouzh noz! Aon ‘m eus bet rak dale oa ganin ha na zeuen ket a-benn da gavout ar strollad! Soñjet ‘m eus n’o doa ket gortozet ac’hanon. Met mat eo bet a-benn ar fin. Tud nevez c’hoazh! Ar wech kentañ e oa d’an ajañs kinnig an nozvezh-se. Bet omp e tour Dentsu adarre (met disheñvel-tre e diouzh noz), da deurel ur sell war Odaiba. Bet omp ivez er World Trade Center (ya ya iskis e ra) e-lec’h ma ‘z eus peadra da welet ar gêr 360° ! Sioul-tre ha dreist ‘m eus kavet al lec’h! Bet omp ivez betek traoñ an Tokyo Tower, da welet tro-dro ar palez ha betek ti-gar Nihombashi a-raok mont da zebriñ ur pred a-feson! Ur sapre devezh ha nozvezh 😉

Sioul-tre eo ar palez met tro-dro ez eus savadurioù sklêrijennet…

E-kichen an ti-gar e oa un tour gant gouleier evit an estajoù!

Takao keñveriet gant Tōkyō. Kornog penn-da-benn!

Takao a-dostoc’h (gwelet ‘vez an ti-gar evit ar fungador ha fungar)

Ar poentoù a zo ar sell war Odaiba. An Tokyo Tower a zo eus tu all ar park er c’hornog. Pignet omp goude betek Nijubashimae (palez) ha Tokyo (ti-gar).

(21 093 paz)

Odaiba

Glav a oa en-dro dimeurzh met fellout a rae deomp mont da Odaiba, enezenn artifisiel Tōkyō. Deuet omp a-benn da gaout emgav diouzh ar beure evit ur wech. N’eus ket bet tu d’ober kement a draoù hag a soñje deomp e Odaiba neuze (ar rod vras da skouer) peogwir e oa gleb pep tra ha na veze gwelet seurt. Un tamm tro hon eus graet memes tra da welet an traoù brudet (delwenn ar Frankiz, ar Gundam bras e-kichen ar Gundam cafe hag all).

Mod all hon eus tremenet an devezh e kreizennoù kenwerzh divent. Diver City, Venus Fort, Aqua City hag unan all c’hoazh. Venus Fort a zo savet e doare ur gêr italian un tamm, kitsch a-walc’h met fentus!Un devezh sioul a-walc’h neuze.
Tremenet omp er stal Lego (prenet ‘m eus un doug alc’hwez evel-just. Laoskel a ran ac’hanoc’h da glask pe hini), e stal Capcom (un dipit braaaaas eo bet evidon, daoust din bezañ prenet 2 vadj Ace Attorney), e Lush evidon , da evañ ur banne kafe d’ur mare zo hag all. Un toullad traoù fentus hon eus merzet : seier bihan plastik a vez roet evit an disglavier, evel-se ne vez ket glebiet pep lec’h. Miret ‘m eus ma hini a-hed an deiz evit chom hep skeiñ ur bern plastik met kavout a ran dreist ar mennozh (n’em boa ket komzet eus ar “parking disglavier” a vez kavet ivez, ul lec’h da lakaat an disglavierioù, a-wechoù gant alc’hwezioù ha tout!). Ur bern stalioù evit ar chas hon eus gwelet ur wech ouzhpenn, unan anezho a oa divent… Hag ur preti evit ar chas zoken!
Ur bern stalioù evit ar vugale a oa ivez, lec’hioù evit c’hoari. Kavet hon eus ur stal levrioù iskis-tre a werzhe ur bern traoù droch gant sonerezh a bep seurt kreñv spontus e lodennoù disheñvel ar stal (bras oa) etre daou lec’h e veske ar sonerezhioù e doare iskis-kenañ…
E Odaiba an hini ‘m eus gwelet Kit kat wasabi (a fell din prenañ evit ober farsadennoù) (e-touez ur bern boued droch all) met kavout a raen kêr neuze m’eus ket prenet ha goude n’am eus ket adkavet biskoazh! Un tamm keuz ‘m eus bet…
Da greisteiz omp bet o tebriñ en un doare self hag iskis e oa an doare da vont en-dro. Ret e oa dibab ha paeañ ur meuz ha roet e veze deomp un doare pellurzhierez iskis. Pa sonne (gant sonerezh “It’s a small world” a vez klevet e Disneyland… Peadra da dreiñ sod!) e oa ret mont da gerc’hat ar meuz prest!
Klasket hon eus mont d’ul lec’h iskis, un doare tavarn frañ-mason kuzh met ne oa ket ar ger kuzh ganeomp ^^ Un toullad traoù plijus hon eus tañvaet (un skornenn “sakura” da skouer, gant edaj dindan) ha gwelet.
N’eo ket bet gwall efedus an devezh met ne oa ket kalz tuoù all evit tremen an amzer gant kement a c’hlav!
Diouzh noz e oamp en ur preti, gweledva ar Rainbow Bridge sklêrijennet ha tout… Brav-eston!

Ur sell a-dost eus Odaiba.

(12 631 paz)

Pourmen e Tōkyō, adarre!

Bev on c’hoazh! Ma digarezit evit an didrouz met gwall dapet on bet, anat deoc’h.
Dilun e oa emgav gant David a ra war-dro ul lec’hienn (pe meur a hini zoken!). O vevañ emañ e Bro Japan abaoe ur pennadig bremañ ha kinniget en deus deomp lec’hioù a blij dezhañ. Kroget eo an devezh tro-dro da di-gar Shimbamba. Da gentañ un templig (hini Kitashinagawa?) ha goude santual Shinagawa. Hon heñcher en deus kinniget deomp tañva traoùigoù (gwastilli apero ha chokolad). E karter Shinagawa ez eus roudoù tiez kozh (‘m eus ket soñj e peseurt danvez e oan graet), un aergelc’h disheñvel-mik eus karterioù all, sioul ha chomet un tamm “war-lerc’h” en ur stumm… bamus a-walc’h eo (ha plijus!). Tremenet omp war ur pont kostez Miura, ur bern gwez kerez e bleuñv a oa c’hoazh. Un tren Pokémon hon eus gwelet ^^ (e-kichen ti-gar Tamachi)
Chomet omp a-sav da ziskuizhañ un tamm e-kichen Shibaura, war un doare terasenn. Brav eston ‘oa an amzer. Bet omp goude war ar Rainbow Bridge da gaout un tamm sell war ar bae hag ar gêr a-bell. Tapet hon eus ar metro emgefre (linenn Yurikamome) a zo heñvel un tamm eus metro Roazhon (evit ar mont en-dro hañ). Ur metro diavaez eo ha neuze e c’haller kaout ur sell war ar gêr e-pad ar veaj. Plijus ken-ken!
Diskennet omp e ti-gar Shinbashi ha tremenet dirak “horolaj Miyazaki” (treset gant MIYAZAKI Hayao. Keuz ‘m eus, n’on ket deuet a-benn da welet an horolaj d’an eurioù e-lec’h ma teu da vev, gant sonerezh HISAISHI Joe ha tout!)
Pignet omp goude-se e-krec’h tour Dentsu (un embregerezh bruderezh eo ma ‘m eus komprenet mat. Ur mirdi a zo en tour hag ar gweledva a zo unan a-feson, digoust ouzhpenn.) An tisavour Jean Nouvel en deus savet an tour-se.War ar skeudenn e c’hallit divinout marc’had pesked Tsukiji (gant an toennoù glaz). Bet omp da zebriñ ur bento e-kichen ar rinier (ha da evañ ur banne te jesmi yen evidon, met n’am eus ket kavet mat tamm-ebet 😥 ), dindan ar gwez kerez, e Tsukishima (a dalvez “enezenn al loar”! Na brav…) (skeudennet ‘m eus aze ar vag treset gant MATSUMOTO Leiji). David n’eus skeudennet ar strollad ivez war a seblant… ^^ Ul lodenn enezenn artifisiel eo ivez (evel Odaiba) bet krouet ur c’hant vloaz zo bennak. Nepell e oa un doare poull gant bigi dilezet, ur c’harter pesketaerien e oa gwechall hag iskis eo gwelet tout an tourioù uhel tro-dro… Tremenet omp ivez dre ur straedig-strizh evit gwelet ur santual dediet d’ur wezenn. Dalc’het eo bet ar wezenn met tiez a zo tro-dro, trapet eo e kreiz ar c’harter. Souezhus! (Na deuan ket a-benn da gavout anv resis ar wezenn-se avat.)

Da c’houde hon eus debret “melon pan” mat-kenañ (un doare briochenn eo). Tremenet omp dirak koshañ post polis Tōkyō. Ul loen-feur eus maskot ar polis a zo e-barzh ^^
Bet omp ivez dre an Tokyo International Forum (ti-gar Yurakucho) a zo sañset heñvel eus diabarzh ur valum. Ya ya.
Pignet omp war toenn ti-post kreiz-kêr , ur sell brav a zo war ti-gar Tōkyō.
Tremenet omp en diabarzh (evit tapout ar metro) a zo kitsch un tamm met plijus da welet.Ha setu ni da vont betek Akihabara (c’hwi oar mat, ar c’harter “elektronek)
Tremenet omp dirak un templ (a gav din) e lec’h ma veze enrollet ur c’hoari evit an tele. Fentus. Bet omp goude betek santual Kanda-myōjin. Du-hont e ya ar mangaka da bediñ evit bezañ embannet, ma rafe berzh o labour ha tout (gwerzhet e vez ivez dougoù-chañs evit stourm ouzh ar beugoù urzhiataer!!), ul lec’h dispar. (Ur briñsez Leia kitsch a zo ivez :D)Ur bleiz brav ivez…
Ha delioù sakura o kouezhañ… Start eo bet din tapout ur skeudenn dereat met n’eo ket deuet re fall, me gav!
Ur bern lec’hioù plijus hon eus gwelet, straedoù bihan dic’hortoz hag all. Ur gwir dizoloadenn.
Un “davarn” strizh-tre evit an dud a blij an trenoù dezho, ur sal e lec’h ma vez abadennoù idol (an Dear Stage)… setu un tamm ar pezh hon eus gwelet e karter Akihabara.
Ouzhpenn eo plijus ar paotr hag ur bern istorioù en doa da gontañ. Un tamm displijusoc’h e oa ober anaoudegezh gant tud ar strollad, reoù zo a oa iskis-tre… Chomet omp un tamm a-gostez gant ar c’houblad mignoned ha bet lesanvet neuze “les blasés”…
Un tamm hegaset omp bet ivez gant priz an devezh peogwir e oa bet lâret e koustfe tro 500 円 mont-dont hag en deus koustet 1500 kentoc’h! Un tamm kalz memes tra.
Ouzhpenn-se ‘m eus bevet evit ar wech kentañ ur prantad displijus abalamour d’ar Japaniz a nac’h anzav n’ouzont ket saozneg (pe n’ouzon ket respont tamm ebet) gant aon feukañ an arval : plac’h an ti-post n’he deus komprenet netra d’am goulenn pa ‘m eus goulennet timbroù evit kartennoù post ha rediet he deus ac’hanon da gemer timbroù dastumadeg! Brav int evel-just met kaaaalz keroc’h evit timbroù ordinal. Kontet ‘m eus an istor-se d’ur paotr a zo amañ abaoe ur pennad ha n’eo ket bet gwall souezhet. N’ouzon ket m’eo un teknik neuze evit touellañ an douristed pe ar plac’h na gomprene seurt met un tamm dinervet e oan da c’houde… (kemennadenn neuze d’an dud a resevo ur gartenn : ur sapre timbr cheuc’h a vo!)
Pa soñjan mat, marteze e oamp imoret fall peogwir e oamp skuizh goude ar c’haraoke, piv ‘oar…
Bet on da zebriñ koan en ur preti cheuc’h spontus, ar Benihana (d’am soñj eo ar pred “California” ‘m eus bet). Brudet eo peogwir eo bet Bill Clinton da zebriñ du-hont ha tout. Ar c’heginer a gegine dirazomp war ur blakenn hag un doare “show” e oa penn-da-benn. Plijus-tre da sellet! (n’eo ket dispar ma skeudenn met evit reiñ ur mennozh deoc’h eo)
Un aergelc’h un tamm drol a oa ouzh-toal avat peogwir ne oamp ket niverus ha n’anavezemp ket an eil re ar reoù all. Ma, saourus e oa, dreist-holl kig bevin Kobe ‘m eus bet ar chañs da dañva! Ur souezhadenn eo peogwir e teuz e gwirionez evel ma vez lavaret…
Echuet eo abred a-walc’h ar pred ha distroet on d’ar gêr. Ar c’houblad all (ma heuliit mat) a zo deuet peogwir o doa laosket o benveg skeudennoù du-mañ hag o doa ezhomm evit an deiz war-lerc’h. Int ivez a oa imoret fall ha neuze e oamp “laouen” holl o chom da gomz un tamm da gontañ an traoù droch bet c’hoarvezet ganeomp…

Kroget omp er Su (Shinbanba) hag adpignet tamm-ha-tamm. Debret hon eus da greisteiz war an tamm enezenn artifisel (Chuo war ar gartenn) ha kendalc’het da bignat betek Akihabara.

(24 825 paz)

Roppongi

Abred on bet o kousket dec’h ha dihunet trankilik ar beure-mañ. Un tamm startoc’h eo bet evit ma c’hamaladed avat war a seblant! Emgav omp deuet a-benn da gaout a-benn kreisteiz. Un tamm poan hon eus bet o tivizout da belec’h mont. Fellout a rae din mont da Odaiba met ne oa ket brav an amzer. Divizet hon eus mont neuze kostez Roppongi. Debret toridon (un û ha kig yar war ur volennad riz).
Tri ac’hanomp zo bet o welet diskouezadeg Alfonse Mucha er Mori Art Museum. Plijus ken-ken e oa, daoust d’an nebeud traoù e saozneg. Ur bern oberennoù, bruderezh, taolennoù, traoù “art nouveau” evel-just met traoù all ivez. E traoñ tour Mori e lec’h m’emañ ar mirdi ez eus un delwenn eus “Maman” (a vez kavet e meur a lec’h er bed a-bezh, dirak mirdioù dre vras) gant Louise Bourgeois.
Un aergelc’h iskis a zo e karter Roppongi, tud o c’houlenn arc’hant, merc’hed koant ha yaouank a seblant muioc’h escort girl evit traoù all, kalz estrañjourien… N’on ket bet fan. Bet omp o straniñ en Don Quichotte ur pezh stal 5 estaj gant ur bern traoù droch. Farset hon eus o lakaat togoù iskis ha tout (ur bern dilhad evit chas da skouer). Goude-se e felle deomp kavout ul lec’h gant stalioù hengouneloc’h met chomet omp da gerzhet e-pad pell hep kavout. Distroet omp da Ōtsuka da zebriñ koan (katsudon ar wech-mañ, kig moc’h panet war riz) ha bet er stal “pep tra da 100 円” bras a zo e-kichen. O tistreiñ gant ar c’houblad a oa bet en diskouezadeg ganin hon eus prenet ur skornenn vanilhez gant fav ruz. Na oa ket fall! Kinniget ‘m eus dezho dont d’an ti, aesaet hon eus an tonkatsu (un daol gant un doare palenn a domm) ha c’hoariet d’un doare “bluffer” (graet er gêr kea). Plijus-tre!

(12 870 paz)