Devezh diwezhañ ha beaj distro

Kudenn ebet evit sevel ha kuitaat an ostaleri. Un tamm droch on bet avat ha prenet ur bilhed evit kemer ar”Port Liner” (ur metro diavaez otomatek e ti-gar Sannomiya) e plas paeañ gant ma c’hartenn suica. Erruet on digudenn e arsav aerborzh Kobe met aet davet an tu fall (war-droad) goude ur prantad e teuas anat din ne oan ket war an tu mat, bet on neuze en un embregerezh ha displeget ez eus bet din e oa ret din distreiñ d’an ti-gar, redet ha bet ur sapre nec’hamant… Met kavet ‘m eus ar bus evit mont d’ar porzh ha n’em boa ket c’hwitet bag 8e a ranken kemer e Kaijo access terminal pier.Berr eo ar veaj (tro 30 munut, aon am boa ivez abalamour d’an tyfon met n’eus bet kudenn ebet) ha setu me neuze o vont d’an aerborzh. Ret eo bet deomp kemer ur bus evit erruout en termnva 1. Ret eo bet din mont da gerc’hat ma malizenn e 4re estaj war an tu dehou (JAL ABC Delivery Counter). Un tamm c’hoari evit adaozañ ar valizenn ‘m eus graet, gant aon evel-just e vefe re bounner ma zraoù… Bet on oc’h enrollañ (kudenn ebet, ne oa ket re bounner ma sac’h) hag o prenañ traoùigoù bihan (ha ranket paeañ gant ar gartenn peogwir e vanke din 300Y am befe gallet espern beure-mañ ma vefen ket bet droch!) a-raok tapout un doare metro da vont davet ar c’hirri-nij. Nijadenn AF 291 11e30 gant Air France neuze! Evel raktreset ez eus bet un tamm dale. En ur c’hortoz e oa ur strollad tud torr-penn o klemm forzh pegement, unan eus an dud-se a oa azezet n’em c’hichen er penn-kentañ ha klemmet n’eus evit mont gant e strollad. Lâret n’eus din e c’hallen dont dirak ivez met me oa disammet bras na vefe ket n’em c’hichen ken (den n’em c’hichen aha!) ha gallet ‘m eus profitañ eus ar veaj trankil neuze.Erruet on e Pariz tro 5e hag un tren da vont betek Naoned a oa ganin da c’houde, adalek ti-gar aerborzh Charles de Gaulle. N’am eus ket bet amzer da goll…

(6 513 paz)

Kōbe

A. & J. a welin emberr a-benn ar fin. Feson glav a zo (ma n’eo ket gwashoc’h) hag int ‘zo vont da bourmen e Kyōtō. Gwelloc’h eo din pourmen e Kōbe ha kaout emgav ganto evit koan neuze.
Diskennet on da dapout an dijuni (mat-tre) ha mont betek ur santual a seblant brav : Ikuta, a zo kichen Tokyu hands (stranet ‘m eus ha prenet profoù diwezhañ du-hont neuze).

This slideshow requires JavaScript.

Tremenet on goude-se e-kichen moske Kōbe (me grede e oa kalz brasoc’h, moske koshañ Japan eo) met n’am eus ket kredet mont peogwir n’em boa netra evit mouchañ ma blev. Goude-se on pourmenet betek Sannomiya o tremen dre straedoù bras hag a-hed “straed ar bleunioù” betek park Higashiyuenchi. War an hent ‘m eus gwelet un draig fentus ivez… Pignet on e tour ti-kêr Kōbe da welet ar gweledva ha bet o kemer ur predig en ur c’hombini ha debret e-kichen ar park.Goude-merenn on bet kostez ar porzh kentoc’h, e lodenn park Meriken. Un doare mein-koun diwar-benn krenn-douar bras Hanshin (1995) a zo aze e-tal ar mor, hag ivez tour Kōbe (met un tamm ker en deus seblantet din setu n’on ket pignet). Plijus ‘oa pourmen aze daoust d’an amzer. Tremenet on dre straedoù Nankinmachi (Chinatown Kōbe) goude, a-raok chom a-sav evit debriñ adverenn e Starbucks (ha kaout bod rak glav bil oa). Emgav em boa gant J&A e-kichen Tokyu hands. Bet omp en ur preti legumaj nepell anvet Yaoya-farm. A bep seurt boued eus ar vro a zo, ur bar saladenn, hag a bep seurt meuzioù awenet gant boued italian pe european… Kemeret goude ma fladad saladenn un dartezenn chifretez ha goude-se un dibenn-pred gant patatez dous. Plijus-tre oa skipailh ar preti. Goude-se omp bet o kemer ur banne kafe en ur c’hafedi ken plijus all, traoù tro-dro d’ar marc’h-houarn a oa (hag ur sapre strollad tud o riboulat ^^), anvet nomadika. Laouen on bet oc’h ober anaoudegezh ganto a-drugarez d’ur genseurtez eus Roazhon 🙂
Distroet on da straniñ er gambr, evet ar banne ‘zo bet profet deomp en ostaleri ha prientet pep tra.  Nozvezh ziwezhañ e bro Japan! 😥

(19 111 paz)

Okayama ha Kurashiki

Setu me prest da weladenniñ Okayama! Glav ‘ra un tammig, tapout a ran ur skeudenn eus an diavaez a-raok kuitaat ar gambr… Da gentañ e rankan ober war-dro ma malizenn da gas d’an aerborzh. Un tamm torr-penn eo bet rak ne felle dezho kompren netra (padal ‘moa skrivet pep tra splann) gant aon ober fazioù moarvat. Pellgomzet o deus neuze da skipailh lec’hienn booking evit bezañ sur o doa komprenet mat… Hir spontus eo bet neuze met eüruzamant eo tremenet mat dre bellgomz ha goude e oant suroc’h. Laosket ‘m eus ma sac’h kein en degemer a-raok mont da welet kastell Okayama.Ne oa ket kalz a dud er c’hastell, evel boaz, un tamm diskouezadeg bennak ha pignat betek lein ar c’hastell. Ur sell a-feson a oa eus aze.Goude-se ‘m eus treuzet rinier Asahi evit mont betek liorzh brudet Korakuen. N’am eus ket kavet ken brav hag ar c’henrokuen met an aergelc’h en deus plijet din kalz ha c’hoant am befe a-walc’h da zistreiñ da vareoù all eus ar bloaz gant gwez e bleuñv pe me oar.

This slideshow requires JavaScript.

Okayama

Tro kreisteiz on distroet da dapout ma sac’h kein a-raok mont da di-gar Okayama. Poan spontus ‘m eus bet o kavout ul locker evit e boz, graet ‘m eus meur a wech tro an ti-gar en aner! Tud all a oa eveldon… D’am soñj ‘oa ur c’hrogad sport bennak rak ur bern tud a oa gwisket pe o werzhañ traoù evit skipailh Okayama, marteze eo abalamour da se e oa ken start kavout plas evit ma sac’h! Pa oan krog da soñjal mont kuit betek Kurashiki gant ma sac’h kein ‘m eus gwelet ur paotr kozh o tont da gerc’hat e draoù en ul logell! Burzhud! Deuet on a-benn da lakaat ma sac’h. Chomet on da zebriñ ur burger e MacDo an ti-gar (erruet skuizh gant an droiad ‘m eus bet c’hoant tapout un dra aes ha buan) a-raok tapout an tren (JR Sanyo Line a lak ur c’hard eur bennak evit mont) da Gurashiki. Ur gêr vihan gant ur bern lodennoù miret brav eo. Bet on da gentañ o weladenniñ ti Ohashi, un ti kozh a oa bet perc’hennet gant marc’hadourien.

This slideshow requires JavaScript.

Goude-se on pourmenet dre garter Bikan, betek mirdi Ohara hag an Ivy Square. Ar mirdi a zo hini koshañ Japan a-fed arz kornogat. Plijus-tre ‘oa ha fromet on bet un tamm o welet un daolenn gant Séruzier du-hont! Bras kenañ eo ar mirdi e gwirionez peogwir ez eus meur a savadur, reoù zo dediet d’an arzoù japanat ivez hag ul lodenn anvet mirdi Kojima un tamm pelloc’h. D’am soñj n’am eus disoñjet lodenn ebet e-kerzh ma fourmenadenn. Bet on goude en Ivy Square neuze e lec’h ma oa un diskouezadeg stalioù jeans, rak jeans a zo bet graet kalz e Kurashiki gwechall. Dedennus! Chomet on a-sav da dapout ur banne matcha latte ha diskuizhañ ma zreid un tammig. Ur seurt drama a oa o tremen aze, gant ur plac’h o ouelañ dourek ha tout. N’am eus komprenet seurt met iskis ‘oa an aergelc’h…

This slideshow requires JavaScript.

Plijus spontus ‘m eus kavet kêriadenn Kurashiki, brav eston ha leun a draoù d’ober, peadra da dremen un devezh (pe un hanter hini evidon) a-feson!

Kurashiki

War an hent da Okayama (tren JR Sanyo Line bepred) e oa ur bern krennarded o tistreiñ ur genstrivadeg sport, kyūdō (gwaregata hengounel japanat) ? Tapet ‘m eus ma sac’h en ti-gar a-raok tapout an tren da Kobe (Hikari 480 betek Himeji ha JR Special Rapid Service betek Sannomiya). Diwezhañ arsav ma beaj…
Poan ‘m eus bet o kavout ma ostaleri, aet e oan dre an nor vat koulskoude (hini ar reter) met eus tu fall an hent-houarn setu na welen ket ma ostaleri Toyoko Inn Sannomiya 2. Aze ivez eo bet un tamm start e-keñver saozneg (un istor gant kempenn ar gambr), souezhusoc’h c’hoazh pa ouzer pegen etrevroadel eo Kobe! Ma. A-greiz-holl ‘m eus bet soñj em boa laosket ar prof evit an dud a welin warc’hoazh em malizenn! Pebezh penn-skañv… Erruet ul lodenn vat eus ma c’hartennoù post ivez hervez kont. Profoù ‘m eus bet ur wech ouzhpenn, n’eo ket displijus ar gambr (estreget ar gweledva nul), pellgomzet ‘m eus da A. & J. a welan warc’hoazh evit kaout emglev, bet o kemer un dra er Mos Burger e-kichen ha tremenet un nozvezh trankil en ostaleri en ur sellet ouzh ur film er skinwel ^^(20 394 paz)

Naoshima

Bet on o tebriñ un dijuniñ fonnus en ostaleri, ne oa ket kalz a dud hag ur plac’h kozh oc’h ober war-dro an dud. Da 9e07 e oan en tren davet Uno (JR Seto-Ohashi Line betek Chayamachi ha goude JR Uno Line). Da 10eur e oan du-se. Chomet on da gemer ur gartenn e ti an douristed a-raok mont da brenañ peadra da zebriñ er 7/11 e-kichen. Ar vag ne oa ket diouzhtu setu ‘m eus bet amzer da lenn goude bezañ prenet ma zikidi ferry. N’eo ket displijus al lec’h gortoz.
Da 11e e oamp er vag hag erruet e Naoshima un hanter-eur war-lerc’h. Gwelet e vez diouzhtu unan eus arouezioù an enezenn, unan eus sitrouilhez KUSAMA Yayoi.
Ur bern tud ‘m eus gwelet o vont da feurmiñ mirc’hi-houarn, me ‘m eus divizet mont war-droad. Traoù iskis ‘m eus gwelet war an hent, met plijus ‘oa ha sioul (ket re a otoioù).Kroget on o vont da welet Gokurakuji, un templ, a-raok mont da virdi Ando. Un ti a ziskouez un tamm labour an ti-savour ANDO Tadao eo. Dipitet on bet un tamm rak gwall vihan eo ar mirdi ha ker a-walc’h mont barzh. Ma! Bet on goude da bourmen un tamm ha gwelet e oa oberennoù eus an Art House Project (oberennoù strewet e pep lec’h) met n’am eus ket komprenet pelec’h e oa tu da brenañ an tiked evit mont barzh. Neuze ‘m eus sellet ouzh an traoù a oa digoust, pe c’hoazh eus ur santual un tamm dilezet gant gwrizioù kevnid divent! Tro 1 eur on chomet a-sav da zebriñ war un draezhenn, sioul e oa pep tra…En ur bourmen ‘m eus tapet ur bern skeudennoù bleunioù a bep seurt, gant livioù flamm ha traoùigoù all kavet war ma hent…

This slideshow requires JavaScript.

Erruet on war an draezhenn evit kouronkañ (Gotanji swimming beach) da c’houde! Ne oa den ha start eo bet din lakaat ma dilhad kouronkañ (rak serret oa al lec’hioù digor e-pad an hañv) met deuet on a-benn da vont da neuial! ^^ Tomm-tre oa an dour!Pourmenet forzh pegement adarre a-raok mont betek Benesse House. Ur mirdi bras ar wech-mañ gant a bep seurt oberennoù. Ul lec’h a-feson. Diskennet on goude betek mirdi Lee Ufan ar wech-mañ. Un aergelc’h ispisial a zo er mirdi met dedennus eo ivez! Goude-se ‘m eus bet c’hoant mont da virdi Chichu met o serriñ ‘oa pe dost (tro 4eur 30 e oa erru) neuze n’eo ket bet gwerzhet din an tiked 😦 Aze ‘m eus bet keuz pas bezañ erruet abretoc’h war an enezenn! Kerzhet ‘m eus davet ar porzh gant an heol o kregiñ da vont da guzh… Ha bet en ur sento/oberenn arz (ur gibell foran eo, disheñvel eus un onsen) : I♥湯. Brav-tre al lec’h! (ret eo bet din bezañ sikouret gant ur plac’h evit lakaat dour an strinkadenn da vont en-dro avat -.-) Goude-se on bet betek ar porzh da dapout ar vag! Brav kenañ oa an oabl e-pad ar veaj. Erru ‘oa noz pa on errue e Uno. Gortozet ‘m eus an treñ da Okayama hag ur wech erruet ‘on bet oc’h ober ur c’hofad er mister donut 😀Ur sapre devezh skuizhus eo bet, gant un taol-heol zoken met un devezh dispar!(26 845 paz)

Kanazawa mod sioul

Savet on a-raok dek eur, sioul. Tapet skeudennoù eus an ti ha prientet un tamm ar pezh a felle deomp gweladenniñ. Da zek eur hanter e oamp e karter ar geisha, nepell eus an ti, dav treuziñ ar rinier Asano hepken : Higashi Chaya. Ne oa ket kalz a dud. Chomet omp a-sav da gemer ur banne te gant delioù aour. Prenadennoùigoù hon eus graet aze (ur bagad bugale o huchal “good morning!” din ur wech ouzhpenn pa oan o c’hortoz Erina dirak ur stal bihan tout :D) a-raok mont da varc’had Omicho ha debriñ ur pladad chirashizushi a-feson. Goude omp bet en ul lec’h heverk eus Kanazawa :  santual Oyama.

This slideshow requires JavaScript.

Distroet omp e Nagamachi peogwir e oa sklaeroc’h an amzer memestra! Ha treuze ar rinier Sai ar wech-mañ betek un eil karter geisha gant tiez te (bihanoc’h avat) : Nishi Chaya. Distroet omp betek an ti da gerc’hat hor seier ha tapet ur bus evit mont d’an ti-gar. Tapet tren 4e01 (Limited Express Thunderbird 34 sañset). Erina a zo diskennet araozon e Kyoto ha bet on betek ti-gar Shin-Osaka da cheñch tren (Sakura 573 6e59) betek Okayama ar wech-mañ. Oc’h echuiñ e oan un danevell eus an dastumad emaon o lenn p’eo chomet sac’het mik ma lenner levrioù niverel! 😦 Erruet on un tamm a-raok 8e (ouzhpenn 430km en holl!). Ret eo bet din klask ma ostaleri (Okayama Sunshine) en noz teñval neuze! Un tamm poan ‘m eus bet met deuet on a-benn goude ur mare. Bez e oa ur skipailh merc’hed aze, evit ur c’hrogad sport moarvat. Un tamm iskis an ostaleri, moketenn lous, c’hwezh butun… Bet on o prenañ boued er 7/11 ha prientet ma devezh pourmenadenn ‘benn warc’hoazh! Ur sapre hini war ar stern 😉
Ur postel ‘m eus bet digant Air France evit lârat eo daleet ma beaj karr-nij (met eus un toullad munutennoù hepken) sañset ne vo kudenn ebet neuze. Setu, emaon gant an devezhioù diwezhañ dija! Na souezhus pegent buan eo tremenet ur wech ouzhpenn!!

Kanazawa zo e krec’h (met n’eus poent ebet)

(16 256 paz)

Kanazawa : kastell, liorzh, mirdioù ha glav!

Kousket ‘m eus mat kenañ war ar futon met ne oan ket gwall entanet evit mont er maez araok na errufe Erina. Chomet on da ober skeudennoù eus an ti hag implijet ar mekanik kafe cheuc’h! Lâret he doa din ar plac’h dec’h e oa fin ar mogerioù ha gwir eo, klevet e vez pep tra er straed hag en tiez e-kichen! Erruet eo Erina goude-se ha war-dro 11eur omp erruet e-kichen kastell Kanazawa. N’eo ket dedennus ar c’hastell kement-se met ar park tro-dro zo kentoc’h brav!Bet omp goude betek liorzh Kenroku-en a zo unan eus bravañ liorzhoù Japan (tri a zo en holl, ar Sanmeien int)! El liorzh omp bet o weladenniñ vila Seison-kaku, a oa ti unan eus gwragez ar c’hlan Maeda. Brav eo miret an ti ha traoù ispisial a zo, gant al livaj da skouer (a oa bet lakaet da zont a-bell evit diskouez pegent pinvidik e oa ar familh) met ne oa ket ar gwir da dapout skeudennoù. Plijus-tre ‘m eus kavet pourmen el liorzh, a bep seurt tud a oa, skolajidi ha liseidi a strolladoù, tud kozh, koubladoù (reoù oc’h ober skeudennoù eured zoken ma ‘m eus soñj mat), touristed estren… Un drugar eo, anat!Goude-se omp bet o tebriñ meren en ur preti e lec’h ma oa bet Erina o labourat pa oa studierez : Full of beans. Ur preti stil european un tamm, gant gwin ha kafe (ur meskaj gall/italian un tamm). Mat-kenañ ar boued (saladenn hag ur c’huri met n’eo ket brav ar skeudenn siwazh 😦 met hini ar preti n’eo ket fall ) ha sioul ha plijus an aergelc’h…War-lerc’h omp bet betek mirdi an XXIvet kantved, ur mirdi arz a-vremañ. Tro-dro d’ar mirid, en diavaez ez eus oberennoù a c’haller c’hoari ganto (un doare milendall livioù, ur gaoued hag all). E-barzh ez eus a bep seurt diskouezadegoù, lodennoù evit skolioù da ziskouez labourioù pe artizaned ivez. Ul lec’h brav ha dedennus-tre eo! Plijet on bet gant ar prantad met n’omp ket bet gouest da vont er “poull-neuial” (unan eus an oberennoù brudetañ) abalamour d’ar glav. Chomet omp da zeskiñ ober skoulmoù brav “mizuhiki“. Ne oa ket saozneg dispar gant ar plac’h met pasianted he deus bet ha kalz plijadur em boa d’ober labour-dorn evelse!Goude-se omp bet betek mirdi D.T. Suzuki, ur prederour zen brudet eo ha brav-tre eo ar mirdi. Gant lodennoù diwar-benn e vuhez, ul lodenn levraoueg/sal studi hag ivez ul lodenn diavaez a-benn chom da brederiañ. Desket ‘m eus ur bern traoù ha gwelet ur savadur dibar.Dedennet omp bet gant ul lec’h a-dreñv d’ar mirdi. O prientiñ ur festival gouleier e oa micherourien. Un den kozh a zo chomet da gomz gant Erina, souezhet o welet un estrañjourez aze. Un tamm adverenn ‘m eus tapet da c’houde gant ur skornenn matcha hag aour (brudet eo Kanazawa evit an aour).Goude-se omp bet betek Naga-machi, ur c’harter kozh met ar stalioù a oa o serriñ ha buan eo kroget ar glav da c’houde! Bet omp neuze da gavout repu e lec’h m’he doa labouret Erina gwechall (ar gevredigezh beajiñ perc’henn war an ti emaomp o lojañ!). Da c’houde omp bet betek preti bihan Yamamoto-san, ENYA 閻屋. Mont a rae Erina du-hont pa oa studierez, santet ‘m eus eñvorennoù plijus evito o daou. Plijus ‘oa an ostaleri strizh gant delwennigoù anime e pep lec’h, Perfume evel sonerezh (ur prantad fentus a zo bet peogwir ‘m eus goulennet ma oa Kyary Pamyu Pamyu hag Erina da respont “met produet int gant memes den!” Gouzout a ouien e oa pouezus perzh ur produer e bed ar sonerezh japanat met e vefe lâret naturel evel-se a ziskouez e oar an holl piv eo produer un arzour hag en deus splann e “verk” war oberennoù an arzourien) ha boued a-feson! D’am soñj ‘m eus tañvaet troad hoc’h evit ar wech kentañ, pesked mat ivez… Prientet dirazomp ha tout. Un drugar! Distroet on d’ar ranndi da dapout ur gibelladenn (video da zont!) ha bet eo Erina da welet mignoned. Plijus ‘m eus kavet an devezh-se, oc’h heuliañ anezhi en he eñvorennoù studierez hag o tizoloiñ he sell eus kêr.

(18 652 paz)

Eil devezh e Takayama

Profitet ‘m eus eus an onsen ur wech ouzhpenn beure-mañ etre 7e ha 9e30 evit ar merc’hed. Bet on o kemer an dijuniñ digoust ivez. Daou baotr o deus goulennet diganin penaos e oa an onsen, goulennet o deus ma oan Alamanez ha lâret din ne oa ket un taol-mouezh gall ganin e saozneg, aha… ya!
Bet on betek ur marc’had bihan, hinie Jinya-mae. Souezhet on bet peogwir e seblante din e oa bras pa lennen pennadoù diwar-benn-se pep lec’h met bihan e oa, aergelc’h sioul… ha profet ez eus bet din un aval gant ur plac’h kozh he deus tapet ivez ur skeudenn ouzhin ^^ !  Bez e oa ur strollad paotred kozh, unan diouto na selaoue ket ar re all, bet on o lârat dezho e oa galvet gant e vignoned, fentus ‘oa ^^ A-raok mont da d/Takayama Jinya ur wech digor al lec’h. N’eo ket ur c’hastell met miret eo bet al lec’h, pourmenet e vez er savadur ha displegadennoù simpl a zo un tamm pep lec’h. Labourioù ‘oa war an doenn avat.

This slideshow requires JavaScript.

Distroet on da gerc’hat ma zraoù er gambr ha da dapout ar profig a oa pa oa ket bet implijet ar broust-dent (un dra ekologel sañset met a c’hall ivez bezañ un tamm lous. Ma, ur broust-dent a oa ganin setu ne oa kudenn ebet evidon^^) ha skeudenniñ kitell iskisañ ar bed :Bet on d’an ti-gar da laoskel ma sac’h kein en ul locker adarre. Bet on o c’houlenn e ti an douristed ma oa mat ar bus a oa o loc’hañ a ranken kemer (bep 40 munutenn e tremen neuze ne felle ket din e c’hwitout!), graet ‘m eus un tamm aon d’ar stajiad yaouank a oa aze, ‘m eus aon! Ma, tapet ar bus digudenn ha setu me neuze o vont da Hida no Sato. Ar bus a chom a-sav e-kichen ur stal ha kinnig a ra ivez stalioù labour-dorn (Hida Takayama Craft Experience Center), chomet on d’ober ur boupinell arouez ar vro ar Sarubobo (poupig marmouz), a veze graet gant ar mammoù ha profet gwechall d’ar vugale ha dreist-holl d’ar merc’hed evit kaout un eured a-feson. Bez e oa ur familh oc’h ober un dra bennak ivez e kichen setu e oa ar plac’h oc’h ober war ma zro ha war-dro ar familh. Sioul e oa an traoù ha plijus ober un tamm labour-dorn evelse! Dic’hortoz un tamm met laouen on bezañ kredet ober ha kemeret amzer evit se. Domaj eo ne vefen ket bet kap d’ober meur a dra! ^^
Bet on betek an dachenn “mirdi” goude a-benn ar fin. Evel boaz e Bro Japan e vez tapet skeudennoù en degemer da werzhañ deoc’h goude. Fentus ‘oa un tamm aze peogwir e oa ur bern dafar (ur pezh sarubobo, disheolerioù bihan hag all) ha merc’hed kozh o skeudenniñ ac’hanon peogwir e oan kawaii, ne? ^^
Ma, ar mirdi diavaez a zo tro-dro d’un doare stank hag a bep seurt tiez a zo da welet, tiez miret evel gwechall hag e-barzh e vez kavet traoù diwar-benn micherioù hengounel ha gwelet an dafar ezhomm evit labourat. Brav ‘oa an amzer ha plijus pourmen e giz-se, sioul…

This slideshow requires JavaScript.

Chomet on da zebriñ un tamm bignez (met n’am eus ket soñj petra ‘oant!) er stal…… ha bet war-droad betek “kêriadenn ekologel an arzhed” (Hida Takayama Teddy Bear Eco Village), ul lec’h gant ur BERN arzhed feur ha gant traoù sañset da lakaat da brederiañ war an ekologiezh. Iskis-tre eo ar meskaj rak traoù moutik tout a zo ha traoù spontus just e-kichen (lanv du da skouer)… Soñjet ‘m eus kalz em mamm-gozh…

This slideshow requires JavaScript.

Bet on goude betek Mirdi an Arz (Hida Takayama Museum of Art). Ker-tre ‘oa mont barzh met un dastumad traoù digredus a zo gant René Lallique, Gallé, Mucha… Ul lodenn dediet d’ar gwer a zo (boutailhoù kaer da skouer) hag ul lodenn all troet kentoc’h tro-dro d’an arz kinklañ. Ne oa den all ebet er mirdi, chomet on sabatuet dirak kaerder an traoù! Goulennet ‘m eus ma c’hallen tapout skeudennoù ha lâret ez eus bet ya din (gant ma ne tapen video ebet), setu ‘m eus tapet ur bern. En ur vont kuit ‘m eus gwelet ur panel “no photo”… Ma… Ur sell brav-tre a zo war kêr ouzhpenn el liorzh.

This slideshow requires JavaScript.

En ur vont kuit ‘m eus goulennet pegoulz e tremene ar bus hag ar plac’h da lârat din e oa unan a-benn nebeut! Bet on buan er maez ha n’am eus ket bet da c’hortoz pell, gwir eo!
Erruet en ti-gar ‘m eus tapet ma sac’h ha bet en tren diouzhtu (Hini 3e10 al Limited Express (Wide View) Hida 11, a errue da 4e42 e Toyama e lec’h ‘m eus tapet an tren JR Hokuriku Line betek Kanazawa)! Un eur c’hoazh a oa da c’hortoz mod all araok an tren diwezhañ ha na ouien ket mat petra ober goude ur sapre devezhig memestra!En tren ‘m eus merzet e oan bet piket brav dec’h evel m’am boa santet! Debret ‘m eus ar wastellennig bet profet en ostaleri ha sellet kalz dre ar prenestr…Erruet on e Kanazawa un tamm a-raok 6eur. 20 munutenn ‘m eus lakaet evit tizhout an ti, en ur gontañ an amzer o c’houlenn sikour digant an dud : n’am befe ket kavet an ti ma-unan, kuzhet-mik en ur seurt ad-straed bihan tout!! Pellgomzet ‘m eus da blac’h an ostaleri un tamm goude da ziskouez din an ti. Soñjal a rae din e c’houlennfe ar plac’h diganin kalz muioc’h eget 8000 yen met nann, chomet eo ar priz a oa bet lakaet. Ur sapre ti eo gant tatami, aozet mat, un drugar. Prenet ‘m eus boued da zebriñ er c’honbini ha debret trankil. Prientet ar futon, tapet ur gibelladenn er gibell iskis-tre ha da gousket!
Laouen bras on bet gant ma zroiad da Dakayama, keuz ‘m eus pas bezañ bet o welet ar savadur iskis a zo templ ur relijion nevez : Sukyo Makihari World Shrine na tañvaet kig bevin ar vro. Ret ‘vo din dont en-dro? 😉 En ur ober un dro da Shirakawa-go marteze?

(13 843 paz)

Takayama : pourmen er gêr gozh

Setu, kregiñ a ra ma sizhunvezh “ma-unan” war an hentoù! Savet on abred hirie evit tapout un tren da 6e26 e ti-gar Tokyo! Souezhet on bet o welet pegen bev e oa ar straedoù da 5e40… Ma eil JR pass a grog hirie. Divizet ‘m eus mont bepred er gweturioù hep plasoù miret evit ma vefe simploc’h pep tra. Prenet ‘m eus traoùigoù da zebriñ ha kemeret ar Shinkashen Hikari 501 (ha kousket a-hed ar veaj tamm-pe-damm) betek Nagoya. Du-hont, da 8e43 ‘m eus tapet al Limited Express (wide view) Hida 3 betek Takayama. En ur c’hortoz an tren ‘m eus tapet ur voestad kafe tomm evit dihuniñ un tamm. En tren-se ‘m eus skrivet kartennoù ha sellet ouzh ar gweledva rak brav e oa me lâr deoc’h! Emaon o vont da vat er menezioù! Hir eo bet ar beurevezh met erruet on da 10e55. Lakaet ‘m eus ma sac’h en ul locker ha bet o kemer ur gartenn e tiig an douristed. Bet on da gentañ betek un templ nepell eus an ti-gar : Hida Kokubunji. Brudet eo peogwir eo templ koshañ ar gêr (bet savet e 746, met n’eus roud ebet eus savadur ar mare-se!), ez eus pagodenn nemeti ar prefeti hag ez eus ur wezenn gingko kozh noe! Sioul-tre ‘oa an traoù.Treuzet ‘m eus rinier Miyagawa evit mont davet ar gêr gozh. Bet on o welet tiez miret : Kusakabe Heritage House ha Yoshijima Heritage House.

This slideshow requires JavaScript.

Goude-se on bet o tebriñ merenn. Kavet ‘m eus un ostaleri gant ur roll-meuzioù e saozneg. Debret ‘m eus toazennoù gwinizh-du gant legumaj ar menezioù (petra oan resis, se ‘zo un afer all!) Bet on war-lerc’h da Takayama Matsuri Yatai Kaikan : mirdi ar c’hirri. Ur pezh festival a vez div wech ar bloaz gant kirri brav-tre (douget gant an dud) ha kozh-kozh! Bamus a-walc’h eo da welet. Un tamm dipitet on rak unan anezho a zo tost kenañ (hini an diskar-amzer a zo d’an 9 ha 10 a viz Here) met distro da Vreizh e vin dija… Ur wech all marteze 😉 Dalc’het eo ar mirdi gant miko (merc’hed ar santualioù shinto, ur santual a zo just e-kichen) ha roet e vez ur mekanik da selaou e saozneg evit an estrenien : plijus evit kompren ‘pezh a vez gwelet! (gweladennoù a zo e Japaneg hepken)Bet on goude-se er santual Sakuraya Hachiman ha da welet ar mirdi bihan a zo e-kichen : Nikkoukan, ur mirdi gant ur vaketenn eus savadurioù brudet Nikko eo!

This slideshow requires JavaScript.

Ur banne matcha latte ha poent stagañ ganti! Divizet ‘m eus ober baleadenn Higashiyama, ur valeadenn 3,5 km a dremen dre a bep seurt temploù hag ur park (pe ur c’hoad zoken), gant roudoù ar c’hastell hag all. Un aergelc’h iskis a zo war straedoù hag hentoù, traoù e stad fall, tiez dilezet a-wechoù… Plijus kenañ ‘oa met n’am eus ket gwelet kalz a bourmenerien all! Setu neuze un toullad skeudennoù da reiñ un tañva deoc’h :

This slideshow requires JavaScript.

Graet ‘m eus ur gartenn eus an hent ‘m eus me tapet (n’on ket sur da vezañ heuliet pep tra resis evel m’eo “ret”).‘M eus aon on bet piket gant ur bikerez avat pa oan o tiskenn eus uhel park Shiroyama…
Ur wech echu gant ar valeadenn on chomet da bourmen e straedoù “kozh” gant artizaned.A-raok distreiñ da dapout ma sac’h en it-gar ha mont d’an ostaleri ar Super Hotel Hida Takayama!Sioul eo ar gambr ha profet e vez produoù da n’em walc’hiñ d’ar merc’hed, kemeret ‘m eus ur maskl evit an dremm hag a bep seurt traoù all… Fentus e oa ivez, posupl e oa dibab ar pijama hag ar goubenner en degemer.Keloù ‘m eus bet digant E&S a zo erruet digudenn a-benn ar fin, a-drugarez d’un tweet “drouk” int bet sikouret da gemer ur c’harr-nij Luftansa (hag a zo hirie gant harz-labour ivez!!)… Ma, gwelloc’h eo ec’h echufe mat an traoù evito met sur ne tistrofont ket gant Air France…
Bet on o tebriñ er Mac Donald’s a-dreñv d’an ti gar o soñjal e oa posupl kaout burger Halloween dija met ar sizhun o tont e vo hepken. Ha ne oa McFlurry ispisial ebet kennebeut. Hañ.
Goude-se on distroet d’an ostaleri da brofitañ eus an onsen (betek 9e50 evit ar merc’hed)! Un drugar!
Na plijus eo bet an devezh-se!!(22 099 paz)

Pourmen dibal kostez Omotesando

N’am eus lakaet dihuner ebet goude an devezh start/iskis dec’h (ha dreist-holl penaos e oa echuet), raktreset em boa mont gant E&S betek an aerborzh ha lârat kenavo du-hont met aze int aet abred diouzh ar beure da glask war-lerc’h ur c’harr-nij bennak. Ma-unan ha dibal neuze! Sellet ‘m eus un tamm petra ‘oa d’ober war lec’hienn Time Out Tokyo ha bet c’hoant mont kostez Harajuku da glask war-lerc’h ar Burger King (ur burger iskis kenañ zo er mare-mañ!), gwelet un diskouezadeg bennak, mont da gemer ur banne chokolad e kafedi Lindt…
Klasket ‘m eus e-pad pell war-lerc’h ar Burger King, pignet ha adpignet straed Omotesando hep kavout ar stal. Goude ur mare ‘m eus paouezet evit mont da glask kentoc’h an diskouezadeg a oa war zu Shibuya. Gwelet ‘m eus un den a roe bruderezh evit kentelioù galleg, me gave din e oa dre aze ar palier arz e lec’h ma oa an diskouezadeg met n’am eus ket kavet kennebeut! Un nebeut delwennoù ‘m eus kavet war ma hent memestra! Chomet on da zebriñ e First Kitchen neuze a-raok mont da gafedi Lindt (se ‘m eus kavet!). Prenet lindor isipisial hag ur banne chokolad hag ur wastelennig. Menam! 🙂Goude-se on bet betek Shibuya trankil. War-var da zistreiñ e tour 109 da welet evit ar vroz eus ar robenn a blije din an deiz all met soñjet ‘m eus e oa trawalc’h a draoù ganin dija! E plas on bet d’ober un dro e Tokyu Hands.Goude-se on distroet d’ober war-dro ma malizenn (nag a draoù ‘m eus!), lakaet ma malizenn da vezañ kaset en Okayama ha diskuizhet rak abred eo ma zren ‘benn warc’hoazh!(13 813 paz)

Mirdi diavaez edo-Tokyo ha keloù fall

Bet on ma-unan beure-mañ da virdi Edo-Tokyo, e diavaez Tokyo, al lodenn “diavaez” eo (Open air museum), ul lodenn all a zo e Tokyo met en diabarzh, n’on ket bet eno. Un tamm pell eo (pelloc’h eget Mitaka, war memes linenn tren, JR Chuo Line) e Koganei. Ur bern tud a oa, un darvoud bras tro-dro da lid an te a oa ma ‘m eus komprenet mat. Leun-chouk ‘oa ar mirdi ha ne oa ket aes sellet ouzh an diskouezadeg diwar-benn an endro e filmoù Ghibli (gweledvaoù met ivez tiez). Dedennus ‘oa avat! Tresadennoù prientiñ, livadurioù, maketennoù… Siwazh ne ouien ket ma oa droet da dapout skeudennoù neuze ‘m eus ket kredet ober !
En diavaez ez eus neuze eus ar mirdi tisavouriezh gant skouerioù tiez a bep seurt mareoù. Plijus-tre eo ivez pourmen aze ha brav eston e oa an amzer!

This slideshow requires JavaScript.

Bet on o prenañ un tamm tra da zebriñ goude ha debret er maez en heol. O tistreiñ gant an tren ‘m eus kaset keloù da E & S peogwir e oamp da gaout emgav e Shinjuku. Keloù fall-tre o deus kaset din avat : nullet eo o beaj karr-nij ha ne gavont doare ebet da gaout un diskoulm na da gaout tud er pellgomz e Frañs evit sikour anezho! Distroet on neuze d’ar gêr evit reiñ amzer dezho da bellgomz ha tout, ha tapet skeudennoù un tamm er c’harter. Skuizh-tre oan (abalamour d’an heol ‘m eus aon!) ha kousket un tamm. An deiz-se eo ivez ‘m eus klevet komz eus ar menez-tan a oa dihunet (Ontake) hag an dud marvet met e Tokyo ne oa netra ispisial. Goude-se on bet o tebriñ koan ganto, kaset anezho da gannañ dilhad ha lâret kenavo… Un tamm trist 😦(16 079 paz)